තිස්ස රවින්ද්‍ර පෙරේරා
ත්‍රස්ත විමර්ශන කොට්ඨාශය,නාවික හමුදාව හා පොලිසියේ ආරක්ෂාව මැද තංගල්ල පැරණි බන්ධනාගාරයේ රඳවා සිටින මහා පරිමාණ මත්ද්‍රව්‍ය ජාවාරම්කරුවෙකු වන හරක් කටා හෙවත් නදුන් චින්තක මේ සතිය වන විට ජංගම දුරකථනයක් තම සන්තකයට ගෙන යළිත් සිය ක්‍රියාකාරකම් ආරම්භ කර ඇතැයි අනාවරණය වේ.
මෙම ජංගම දුරකථනය හරක් කටාගේ මත්ද්‍රවය ජාලය මෙහෙය වන සමීපතමයා වු මිදිගම ලසන්ත වෙත කතා කිරීමට පමණක් යොදා ගන්නා බවද හෙළි වී ඇත.
විශේෂත්වය වෙන්නේ මෙවර පළාත් පාලන මැතිවරණයට හරක් කටාගේ සමීපතමයා බව කියන මිදිගම ලසන්තද තරග කිරීමය.
හරක් කටාගේ අනුදැනුම ඇතුව ප්‍රදේශ රැසක වූ ඝාතන රැල්ල හා මත්ද්‍රව්‍ය ජාවාරම් සියල්ල මෙහෙයවන්නා ලෙස ප්‍රකට බව කියන මිදිගම ලසන්ත තම සටන් පාඨය කරගෙන ඇත්තේ “තම ගම නගරය සංචාරක කේන්ද්‍රස්ථානයක් බවට පත්කරන බවටයි”
හරක් කටාගේ ඝාතන රැල්ලට යොදාගත් ටී පනස් හය අවි දහතුනක් හා පිස්තෝල අවි නමයක් සගවා ඇත්තේ ලසන්තගේ භාරයේ බව විමර්ශන කණ්ඩායම් වෙත තොරතුරු ඇතත් අද වනතුරු ඒවා අත්අඩංගුට ගැනිමට අසමත්ව ඇත.
අවසන් වරට මිදිගම රුවන්ගෙන් ලැබුණු හෙරෝයින් කිලෝ පනහක් අතරින් කුඩු කිලෝ 25ක් මිදිගම චූටි හා ලසන්ත එක්ව සඟවා කළ ජාවාරමක් නිසා මෙම කල්ලි අතරද අභ්‍යන්තර ආරවුල් පැන නැගී ඇතැයි ඩුබායි වලින් පැවසෙන ආරංචි සඳහන් කරයි.
හරක් කටා රඳවා සිටින අධිආරක්ෂිත බන්ධනාගාරයේ සිට දුරකථන මගින් යළි අරඹා ඇති මෙහෙයුම් සමග ඉදිරියේදී යළිත් ඡන්ද සටන උණුසුම් වනවා මෙන්ම ඝාතන රැල්ලටද පණ පෙවීමට ඉඩ ඇත.
රැඳවුම් බාරයේ පසුවන හරක් කටාට තම නීතිඥවරු හමුවේ දිනකට පැයක් කතා කිරීමටත්,තංගල්ල රෝහලේ සර්වාංග වෛද්‍යවරයෙකු හමුවට පැමිණවීමටත්,° මව හා පියා මෙන්ම බිරිඳ හමුවීම සඳහා පැයක කාලයක් ලබාදීමටත්,පිටතින් ආහාර ලබා ගැනීමටත්,විදෙස් ගතව සිටින දරුවාට දුරකථනයෙන් කතා කිරීමටත්,ඇතුළු පහසුකම් රැසක් හරක් කටා වෙනුවෙන් පෙනී සිටි නීතිඥවරුන් අධිකරණය හමුවේ මීට පෙර ඉල්ලා තිබුණි.
හරක් කටා භාවිතා කරන මෙට්ටය හා කොට්ටය මාරු කර දීමට මෙන්ම නීතිඥවරුන්ට හා දෙමව්පියන්ට කතා කිරීමට පැය භාගයක කාලයක් හා අනෙකුත් පහසුකම් ලබා දීමටත් අවසර දුන්නේය .
අධිකරණයෙන් පහසුකම් සදහා සියලු අවසර නොලැබුණත් හරක් කටාට යළිත් සිය ක්‍රියාකාරකම් රිසිසේ කරගන්නට ජංගම දුරකථනයේ සිට සියලු පහසුකම් සපයා දීමට හරක් කටාට ආරක්ෂාව සපයන දුෂිත නිලධාරින් පෙළඹී ඇත.
අපරාධ පරීක්ෂණ දෙපාර්තමේන්තු භාරයේ සිටියදීත් හරක් කටාට සුවපහසු කෑම බීම වල සිට සියලු පහසුකම් සපයා දීම සම්බන්ධව කතාබහ සහ ගනුදෙනු රැසක් ගැන කියවෙන්නේය.(එය පසුවට පාඨකයන්ට ගෙන එමට හැකිය).
දැන් හරක් කටා සූදානම් වන්නේ මෙවර පළාත් පාලන මැතිවරණයෙන් තම මත්ද්‍රවය ජාවාරම්කරුවකු කරලියට ගෙන එන්නට විය හැක.
මීට පෙර ඉතිහාසයේත් කොස්ගොඩ සුජීගෙ පවුලේ නෑදෑයන්,කොස්ගොඩ තාරකගේ පවුලේ අයටත්,එංගලන්තේ කුඩුලාල්ගේ පවුලේ පුතුන්ටත් දේශපාලනයට පිවිසෙන්නට ප්‍රධාන පක්ෂ ඉඩ දුන් ආකාරයටම මෙවර හරක් කටාගේ ජාවාරම් මෙහෙයවන්නා දේශපාලනයට ගෙන එන්නට ප්‍රධාන පක්ෂයක් ඉදිරිපත් වී ඇත.
( මාධ්‍යවේදී තිස්ස රවින්ද්‍ර පෙරේරා වටිසැප් සමුහයට මුදාහල ලිපියකින් උපුටා ගත්තකි.)
2025-04-05